पोखरा विश्वविद्यालय, स्कूल अफ हेल्थ एन्ड एलाइड साइन्सेस बीएस्सी नर्सिङ कार्यक्रम १५औँ ब्याच, दोस्रो वर्षका विद्यार्थीहरूको सामुदायिक स्वास्थ्य नर्सिङ पाठ्यक्रम अन्तर्गतको “कम्युनिटी पोस्टिङ” को रूपमा आज मिति २०८२ साल माघ २ गते शुक्रबार पोखरा विश्वविद्यालय शिक्षण अस्पतालको सहकार्यमा एकदिने स्वास्थ्य शिविर तथा स्वास्थ्य प्रदर्शनी कार्यक्रम सम्पन्न भएको छ।
कास्की जिल्लाको रुपा गाउँपालिका–६, भिरचोकस्थित मियाँगाउँमा सम्पन्न कार्यक्रममा १२२ जना स्थानीय नागरिकहरूलाई स्वास्थ्य परीक्षण तथा परामर्श सेवा प्रदान गरिएको थियो। शिविरमा डा. विष्णु भण्डारीको विशेषज्ञ उपस्थितिमा चिकित्सक तथा स्वास्थ्यकर्मीहरूको टोलीद्वारा स्वास्थ्य सेवा प्रदान गर्नुका साथै दन्त स्वास्थ्यसम्बन्धी परीक्षण तथा परामर्शसमेत प्रदान गरिएको थियो। उक्त कार्यक्रम पोखरा विश्वविद्यालयका उप–प्राध्यापक तथा बीएस्सी नर्सिङ कार्यक्रम संयोजक पुष्पा पौडेल र उप–प्राध्यापक कल्पना कटेलको समन्वयमा सम्पन्न भएको थियो। स्थानीय जनप्रतिनिधि तथा जनसमुदायको उल्लेखनीय उपस्थितिले कार्यक्रमलाई अझ प्रभावकारी बनाएको थियो । 
